潮文共賞第16話 ︳亞姐潮文 重播亞姐畀人笑到面黃 ︳

「潮」是潮流的潮，「文」是網絡文章的文，只要夠爆、夠頂癮、夠貼地、夠好笑，任何文章都可以是潮文。
生活那麼苦，「潮文共賞」由謝遜聲音導航，望為諸位添上一點甜，絕對有益身心健康﹗

第16話﹕亞姐潮文 重播亞姐畀人笑到面黃

特別嗚謝：高登會員PZG

⬇️ 原文 ⬇️
hi你auntie亞視，今晚唔hi你個廢台真係對唔住自己！枉我由《我和彊屍有個約會》一直撐你撐到而家，累我喺酒樓畀人笑到面黃！

話說今晚公司收早，去咗樓下間酒樓食晚飯，命水好派到張靚枱，坐正喺電視側邊，見到播緊亞姐選舉。數下手指，自己因為返工賺錢糊口，已經兩三年冇睇亞姐選舉，今晚機緣巧合，仲要播緊泳裝環節，條條女有前有後，咁就梗係坐定定一路食一路睇啦。

如是者睇咗泳裝加淘汰環節，我見坐喺旁邊幾位叔伯父都睇到笑笑口，好亢奮咁，就同佢哋講：「呀~~今屆亞姐啲質素幾得喎！正過港姐好多！」點知班叔伯借咗聾耳陳對耳咁，完全冇理我。Fine~ 搭訕冇人理，有幾失威，我年中遇唔少，家常便飯啦，繼續睇囉！

如是者睇到去公佈冠亞軍結果，真係好緊張！事關由我坐低食飯嗰刻，一路撐嗰個叫咩「維他之寶」嘅俄妹竟然殺到入冠亞！我忍唔住坐喺個位度望住個電視起勢咁大叫「維他之寶！維他之寶！」但旁邊班叔伯仍然笑笑口咁，冇咩反應。我心諗：咁拘緊做咩啫，一齊叫先High㗎嘛。

最後公佈賽果，維他之寶拎得個亞軍，冠軍畀個中國妹拎咗，我坐返喺個位大叫：「hi！有咩理佢贏㗎！」呢個時候身邊一陣笑聲，其中一個咬住牙籤嘅阿叔笑住同我講：哥仔，你上年冇睇咩？個選舉上年㗎喎！我心諗：咁搞笑？！即刻睇返亞視場景個Board，hi auntie，真係寫住「2010」，當堂面都黃晒，即叫部長埋單。埋單嗰陣個部長仲要忍住笑咁安慰我同我講：唔緊要啦，亞視係咁㗎啦！

hi你auntie！亞視你有冇譜㗎？上年亞姐選舉都夠膽拎返出嚟播，仲要揀返暑假播畀塊蕉皮我踩！你執咗佢啦hi！全部呀！一花一草一塊石仔一粒塵埃！總之係亞視嘅嘢全部同我執晒佢呀亞皆老街！

APPLE ● SPOTIFY ● YOUTUBE 等各大平台登場。

----------
【SOCIAL MEDIA。讚好謝遜】
✅ linktr.ee
--
Hosting provided by SoundOn