潮文共賞第06話 ︳黃大仙呈現香港特色事件 ︳

「潮」是潮流的潮，「文」是網絡文章的文，只要夠爆、夠頂癮、夠貼地、夠好笑，任何文章都可以是潮文。
生活那麼苦，「潮文共賞」由謝遜聲音導航，望為諸位添上一點甜，絕對有益身心健康﹗

虎年特別篇第06話﹕黃大仙呈現香港特色事件

特別鳴謝﹕名校secrets@FB

⬇️ 原文 ⬇️
以下哪一個地鐵站名（旺角、黃大仙、迪士尼）最能呈現香港特色？試達成共識。

因為呢題淨係問個站名，講其他活動或者地點就會離題，所以其實冇幾多嘢好講。加上我嗰組都平平均均，冇學霸冇豬冇狂人，E同學連首輪都冇出聲，所以我哋講完「旺角好旺」、「迪迪尼係英文字讀過嚟所以象徵香港中西文化都有」、「黃大仙=香港人迷信」之類，就冇晒point，dead晒。

望住個鐘，仲淨返四分鐘左右，大家你眼望我眼，dead咗五秒，已經冇嘢好講了。

當時我哋全組唔計E同學，個個都已經有1+2，其實可唔可以搵人完咗個討論佢呢？冇point喇喎，嚟嚟去去得3個point，講多又離題喎！相信當時並唔係得我一個有咁嘅諗法。

突然！B同學開口喇！

正當我哋以為救星出現，有新point嘅時候…

B(本身揀黃大仙)：「聽咗各位嘅意見，我都同意三個地點各有可取之處，但我依然認為黃大仙係最適合嘅選項。唔知大家有冇聽過百家姓呢樣嘢？香港人有好多唔同嘅姓氏，例如姓陳、李、張等等。而其中一個最多人嘅姓氏，就係姓黃喇！好似我咁，我同我阿爸、我阿爺、我太爺都係姓黃嘅。而黃大仙都係姓黃嘅，所以我認為黃大仙對香港人嘅代表姓較高。未知大家會否考慮改變立場以盡快達成共識呢？」

我嗰吓呆咗，諗諗吓雖然膠膠地但起碼又冇離題，可能大家都係咁，又或者已經放棄咗人生。跟住…

A(本身揀旺角)：「回應返頭先B同學嘅觀點啦。B同學就話因為佢同黃大仙一樣都係姓黃，所以佢揀黃大仙。聽完佢咁講之後，我都突然醒起，原來自己都係姓黃嘅人。根據我屋企管理處舊年做嘅統計，我居住嘅地方都係最多人姓黃。例如文具店嘅黃嫂啦、小食店嘅黃叔啦、樓上嘅老王等等。可見香港人大多數係黃氏家族嘅子孫。所以我贊成黃大仙呢個名可以呈現香港多人姓黃嘅特色，並決定將立場改為黃大仙，以助大家早日達成共識。」

D(本身揀旺角)：「冇錯喇！我都好同意頭先同學嘅觀點。的確正如同學所講，唯有黃大仙先可以顯示香港多人姓黃。反觀旺角喺呢方面就稍有不足。旺角，只係一個角。但係香港，姓黃嘅人就散佈喺每個角落，並唔係得一個角。好似我咁，我都姓黃，但我同其他同學就唔係住埋一個角。所以我都同意黃大仙可以呈現到香港嘅特色，並更改自己嘅選擇為黃大仙，希望大家達成共識。」

算啦，大家又對望，其實都明㗎喇，都冇point好講了。我唔理喇！我地四個一條心，trust in 隊友！

我(C)(本身揀迪士尼)：「聽完頭先同學嘅觀點，我都好同意。唔知大家知唔知華人仲有另一個名，就係炎黃子孫呢？相信香港人大部分都係炎黃子孫。炎黃子孫有個黃字，黃大仙都有個黃字。相反，迪士尼呢個名象徵住嗰隻老鼠嘅樂園。但香港人唔係老鼠嘅子孫，香港呢個地方本身都唔係樂園，而係煉獄。所以我都同意比起迪士尼，黃大仙更能呈現香港人係炎黃子孫嘅特點，並轉立場同大家一樣揀黃大仙。」

靜咗十秒左右，我仲望住留俾其他人講總結。點知呢個時候，連首輪都冇出聲嘅E同學突然開口了。

E：「唔好意思！正如霍金唔係姓霍、諾貝爾唔係姓諾呢個道理一樣，我諗黃大仙都唔係姓黃！黃大仙三個字係地方名！冇地方姓呢樣嘢！」

隨着E同學嘅吶喊，計時器亦同時響起，呢個荒謬至極嘅小組討論結束了。離開試場後，我同ABD同學相視而笑，並交換咗contact，開咗個全男嘅四人study group。

真心覺得，比起呢題，成個2018中文oral嘅第一題，根本就係考小學生升中學用嘅。

APPLE ● SPOTIFY ● YOUTUBE 等各大平台登場。

----------
【SOCIAL MEDIA。讚好謝遜】
✅ linktr.ee
--
Hosting provided by SoundOn